O ourizo é un produto do mar de recoñecido prestixio polo seu intenso e exquisito sabor e polo seu extraordinario valor culinario. Por estas razóns, así como pola forte tradición de consumo, ano tras ano celébrase unha xornada gastronómica dedicada a este apreciado equinodermo. Na festa participan a maior parte dos establecementos hostaleiros da vila (bares e restaurantes), que preparan o ourizo en diferentes receitas: croquetas, empanada, tortilla, ao natural, cocidos, 'pudin' e outras moitas especialidades, buscando ano tras ano combinar as variedades tradicionais coa innovación.