As empresas Frida, Ladybug, Numax e Vaca promoven o cine galego no Marché du Film de Cannes

As empresas galegas Frida Films, Ladybug Films, Numax Distribución e Vaca Films participan no Marché du Film do Festival de Cannes, que se desenvolve ata o vindeiro venres como a principal cita profesional para o sector cinematográfico internacional. A presenza galega neste importante mercado conta co apoio da Consellería de Cultura, Educación e Ordenación Universitaria mediante o programa de internacionalización e promoción do audiovisual galego que a Axencia Galega das Industrias Culturais (Agadic) desenvolve xunto co Instituto Galego de Promoción Económica (Igape) en feiras de todo o mundo.

Aínda que con diferentes obxectivos concretos, as accións destas catro empresas no Marché du Film teñen como común denominador a procura de oportunidades financeiras, de coprodución e compra-venda para os seus novos proxectos audiovisuais, moitos dos cales dispoñen de axuda económica da Agadic a través das súas diferentes modalidades de subvencións ao sector.

Foros de coprodución e negocio

Frida Films, por exemplo, foi convidada a participar nos foros de coprodución e negocio Cinéfondation L’Atelier e Producers Network, ao tempo que traballa no peche de vendas internacionais para Trote, primeira longametraxe do director Xacio Baño, e na busca de acordos de coprodución para novos proxectos en fase de desenvolvemento.

En canto a Ladybug, o pasado venres tivo a oportunidade de amosar as primeiras imaxes da película de animación Memorias dun home en pixama, que se atopa actualmente en proceso de postprodución. Dirixido por Carlos Fernández e Paco Roca, e coproducido xunto a Dream Team Concept e Hampa Studio, foi o único filme español dos cinco seleccionados na sección Aneccy Goes to Cannes.

Outros títulos cos que Ladybug viaxou ao Marché du Film na procura de acordos e contactos son As dez últimas, en preprodución, e Dinogames e Skizo, ambas en fase de desenvolvemento.

Os representantes de Numax, pola súa banda, está a asistir aos encontros profesionais nos que se debaten as novas tendencias de exhibición e distribución independentes, ademais de coñecer de primeira man os títulos máis sobresaíntes que se estrearán o ano que vén no circuíto de salas cara á súa programación no Cinema Numax de Santiago e de estudar a adquisición de novos filmes para o seu catálogo de distribución.

Tamén Vaca Films está a manter reunións co obxectivo de pechar acordos internacionais para proxectos que ten en fase de desenvolvemento como Feedback, Quen a ferro mata, La ley de plomo ou Kidnapped.

O ‘Marché du Film’ de Cannes supón unha oportunidade única para a compra, venda, financiamento, distribución e coprodución dos contidos que reúne. Anualmente congrega 20.000 profesionais, entre produtores, distribuidores de cine, axentes de vendas e programadores de festivais de todo o mundo.