O XXIV Premio Aresa distingue a Moexmu pola súa contribución á profesionalización do sector agrogandeiro

O reitor da USC, Antonio López, puxo en valor o traballo feito ao longo deste tempo polas distintas comisións organizadoras que cada ano traballan a reo para encher de vida o recinto Manuel Vila de Muimenta, ao transformalo por uns días en escaparate tecnolóxico con apeiros e maquinaria agroforestal de última xeración, ademais de en escenario dun concurso de gando de alto nivel, o único certame de gando frisón que se segue a celebrar na provincia de Lugo.

Daquela, o cometido da Moexmu para a profesionalización do sector gandeiro, a remuda xeracional no agro, o desenvolvemento do rural e a posta en valor da gastronomía local, a través da celebración da Festa da Filloa, foron outros dos méritos valorados polo xurado para a concesión deste galardón, lembrou o reitor Antonio López, quen se referiu ao presidente fundador de Aresa como como “alma máter deste galardón e exemplo de vitalidade e de compromiso co rural”.

A cerimonia de entrega da vixésimo cuarta edición do Premio Aresa, un galardón convocado pola empresa fundada e presidida por Álvaro Rodríguez Eiras xunto coa USC e dotado dunha gratificación en metálico de 10.000 euros, ademais de placa conmemorativa para a candidatura distinguida, tributou este venres unha homenaxe anticipada á Moexmu, a feira das feiras da Terra Chá, que cumprirá as súas primeiras 40 primaveras do 5 ao 7 de abril en Muimenta, cuxa veciñanza completa e complementa cada edición da súa mostra exposición coa Festa da Filloa, unha cita máis saborosa que volve cita a comezos de maio numeroso público nesta localidade chairega.

Intervencións

A conselleira e directora de Marketing e Exportación de Aceites Abril, Elena Pérez Canal, abriu a quenda de intervencións da gala de entrega do XXIV Premio Aresa, unha concorrida cerimonia na que tamén interviñeron o conselleiro en funcións de Medio Rural, José González; o vicerreitor de Organización Académica e Campus de Lugo, Francisco Fraga, e a catedrática da área de Tecnoloxía dos Alimentos no Campus Terra da USC, ademais da vicepresidenta de Aresa, Carlota López Pardo, co relatorio ‘O aceite que pon en valor a gastronomía local’.

Na súa intervención, Pérez Canal tratou de como construír marca reivindicando o patrimonio culinario, as festas gastronómicas ou as tradicións, ao tempo que fixo referencia á candidatura da Moexmu, gañadora do XXIV Premio Aresa, a que se referiu como “unha feira de recoñecido prestixio e recoñecemento”. No contexto desta analoxía, Pérez Canal fixo tamén un repaso polas últimas campañas publicitarias da súa marca, Aceites Abril, nas que puxeron voz a persoas anónimas que conforman o universo gastronómico galego, xa que “as produtoras e elaboradoras son as que miman e coidan os produtos da terra e do mar para que receitas de toda a vida cheguen ás nosas mesas”, dixo.

Premio

O xerente da Moexmu, José Manuel Rus, recolleu de mans de Álvaro Rodríguez Eiras e Antonio López o XXIV Premio Aresa, “un galardón moi gratificante para min e para todo o equipo da Moexmu”, dixo. De seguido, Rus dirixiuse ao poboado auditorio de Veterinaria para lembrar algúns dos obxectivos principais da Moexmu, tales com son “potenciar o sector primario a través sobre todo do concurso, da exposición, da poxa e tamén da artesanía, co exemplo dos zoqueiros; loitar contra o despoboamento, gran problema do rural a día de hoxe, e recoñecer tamén o espírito emprendedor da veciñanza de Muimenta”.

Rus finalizou a súa intervención solicitando que Aresa e a USC “deberían tamén ter algún tipo de recoñecemento por promover iniciativas coma esta” ao tempo que convidou a todo o público presente a achegarse á vindeira edición da Moexmu.

A vicepresidenta de Aresa, Carlota López Pardo, salientou na súa intervención a transformación do rural experimentada ao longo dos vinte e catro anos de celebración deste premio e fixo referencia ás protestas que o sector agricultor e gandeiro está levando adiante nas últimas semanas en toda Europa, ante as que transmitiu o seu total apoio “para garantir a súa supervivencia”.

López Pardo puxo tamén de manifesto os retos aos que se terá que enfrontar o mundo rural, “A adaptación a normativa medioambiental, a remuda xeracional e a competitividade” son fitos importantes, pero López Pardo tamén fixo alusión, en contraposición a estas dificultades, ás oportunidades coas que xa se contan, como son “o alto grao de tecnificación e profesionalización das empresas, das que son exemplo a gran parte das candidaturas ao Premio Aresa”.

A vicepresidente de Aresa tamén tivo palabras agarimosas para a Moexmu, da que destacou “a súa ampla traxectoria, a súa implicación con empresarios e empresarias da comarca e o desenvolvemento de novas iniciativas cada ano”, ao tempo que reiterou o seu agradecemento á colaboración recibida da USC, ao conselleiro e a todos os asistentes presentes no acto.

A alcaldesa do Concello de Lugo, Paula Alvarellos; o presidente da Deputación de Lugo, José Tomé; a subdelegada do Goberno en Lugo, Isabel Rodríguez; a directora de GAIN, Paula Argerey; o alcalde do Concello de Cospeito, Armando Castosa, e os rexedores de Friol e Ribeira de Piquín, ademais de parlamentarios autonómicos e voceiros dos distintos grupos políticos municipais de Lugo foron algúns dos representantes políticos que se deron cita na gala de entrega do XXV Premio Aresa de Desenvolvemento Rural.