O Clúster Alimentario de Galicia participa na Semana das Rexións Innovadoras, en Hungría

O Clúster Alimentario de Galicia participará, xunto coa Ptgal, na WIRE2011, que está organizado pola Axencia Rexional de Innovación de Hungría (INNOVA Észak-Alföld Regional Innovation Agency) e a Comisión Europea, e que se celebrará do 7 ao 9 de xuño, en Debrecen, Hungría. O CLUSAGA contará cun stand propio no que se darán a coñecer produtos innovadores e saudables elaborados en Galicia, e os traballos desenvolvidos polos centros de investigación e as universidades galegas neste ámbito.

Este evento pretende buscar unha conexión entre o desenvolvemento dos Clústers e as políticas das infraestruturas de investigación, coa finalidade de mellorar a calidade dos procesos de transformación innovadores (en distintos ámbitos) e do desenvolvemento rexional. Ademais, durante estes 3 días, trataranse e analizaranse cuestións relacionadas co coñecemento, a innovación e a competitividade na economía, con respecto aos investimentos que hai en infraestruturas de investigación, nos clústers e os seus efectos sobre a forma en que poden dar soporte a un desenvolvemento e crecemento máis efectivo das rexións europeas.

A WIRE2011 pretende poñer sobre a mesa, así mesmo, a urxencia de desenvolver as políticas de innovación e de investigación a nivel rexional. Neste senso, xorden diversas cuestións:

1. Poden as rexións utilizar de maneira máis eficiente os recursos dedicados á investigación e desenvolvemento, especialmente os Fondos Estruturais, o Programa Marco de Investigación, o Programa de Competitividade e Innovación e outros recursos de financiamento, para dar soporte aos seus clusters e ás infraestruturas de investigación?

2. Que estratexias intelixentes de especialización (relacionadas coas políticas rexionais da UE) se poden habilitar para optimizar o uso das infraestruturas de investigación, considerando o seu papel nos clusters e nos sistemas e redes rexionais de apoio á innovación rexional? Como se pode garantir a cooperación entre as rexións da UE, mantendo a coherencia entre as prioridades definidas polos diferentes niveis de goberno?

3. Pode a dimensión rexional das infraestruturas de investigación contribuír ao desenvolvemento rexional e a mellorar a investigación e a innovación nos diferentes procesos de produción? Completarán os Estados membros a construción e a posta en marcha do 60% dos proxectos de infraestruturas de investigación da folla de ruta do ESFRI para o ano 2015, como se indica na Unión pola Innovación?

4. Poden as ferramentas, tales como os consorcios de infraestruturas de investigación europeos, axudar a mellorar a construción e o acceso ás infraestruturas de investigación de alta calidade?

WEB WIRE2011:
http://wire2011.eu/