Raquel Arias reivindica a permanencia dos valores que garda o legado popular e a súa compatibilidade "cunha ollada global"

A delegada territorial da Xunta en Lugo, Raquel Arias, destacou que o belén de Begonte e todo o movemento cultural e social que hai arredor del representa “un gran exemplo vital para todos nós”. Arias fixo estas declaracións durante a presentación do XL Nadal en Begonte, unha representación cultural que engloba un abano de propostas culturais que se desenvolven ao longo de case dous meses e que ten como máis destacada manifestación o xa tradicional belén electrónico. Na presente edición, o pregón de apertura correrá a cargo do presidente da Xunta, Alberto Núñez Feijóo.

Arias considerou que o Nadal en Begonte é unha proposta que “engarza cultura, relixiosidade e manifestación social”, recollendo mostras do noso acervo cultural. Neste sentido, a delegada territorial aludiu a que hai que seguir valorando “o popular, o rural e o natural” característico da nosa sociedade. “Os valores que aínda perviven nas aldeas desta comunidade teñen que compatibilizarse cos da nosa sociedade, por moi avanzada que sexa, por moi global que resulte a nosa contemplación do contorno”, subliñou a máxima representante do Executivo galego na provincia durante a presentación do Nadal en Begonte.

Respecto ao pregón, Arias asegurou que “a organización garantiuse a presenza do mellor embaixador de Galicia na actualidade, Alberto Núñez Feijóo”. Neste sentido, a presente edición será a segunda que contará como pregoeiro co presidente galego, posto que no ano 1992 fora Manuel Fraga quen abrirá as actividades.

En canto as iniciativas culturais que engloba o XL Nadal en Begonte, o mesmo día da inauguración actuará o Orfeón Lucense, que abrirá un especial tempo cultural no que se desenvolverán os certames de xornalismo –patrocinado pola Xunta de Galicia-, poesía, debuxo infantil e o Certame Galego de Arte, todos eles convocados polo centro cultural José Domínguez Guizán.

Así mesmo, a mostra Imaxes do Nadal será exposta en Cospeito e en Vilalba, mentres que as obras pictóricas presentadas ao Certame Galego de Arte serán expostas ao público primeiro en Begonte e logo en Lugo, na sala de arte do Edificio Administrativo da Xunta de Galicia. A tempada do Nadal en Begonte pecharase o 28 de xaneiro coa entrega de premios e a actuación da Coral Polifónica de Vilalba.

Na presentación destas actividades participaron tamén José Ulla Rocha, alcalde de Begonte; Pilar Gómez, viúva de José Rodríguez Varela, artífice do belén, e o vicepresidente do centro cultural begontino, Xulio Xiz.

Fotografía: Carlos Rodríguez Arias