O Concello de Ourense estará presente en Fitur para promocionar a riqueza termal e atraer inversores

Seguindo a estrutura do foro termal celebrado no Liceo de Ourense os días 17 e 18 de xaneiro, o Concello de Ourense organizará, co mesmo obxectivo de posibilitar a concreción de investimento privado que contribúa a crear riqueza e posibilite a xeración de emprego na cidade, encontros e reunións este xoves e venres, en Madrid. No marco da Feira Internacional de Turismo FITUR, o alcalde, Agustín Fernández, e os concelleiros de Termalismo e Promoción Económica, José Ángel Vázquez Barquero, Urbanismo, Áurea Soto, e Turismo, Mónica Vázquez, estarán presentes nos actos e reunións programadas.

Os participantes coñecerán a riqueza e potencialidades dos recursos termais, naturais e patrimoniais da cidade de Ourense, as propostas contempladas no novo planeamento urbano para a implementación de proxectos privados de inversión no ámbito termal ou os proxectos que poidan contribuír a aumentar o atractivo da cidade desde un punto de vista inversor, como a chegada da Alta Velocidade e a proposta de construción da nova estación do AVE.

Con respecto ás actividades a desenvolver, o seguinte é o programa previsto:

Xoves, 31 de xaneiro:

17 h. - 17:30 h. (stand de Turgalicia en FITUR): acto organizado conxuntamente por Expourense e o Concello de Ourense, que consta de: presentación do Foro de Inversores, proxección do vídeo “Ourense capital termal”, e presentación da Feira Internacional de Turismo Termal TERMATALIA. Asisten o alcalde e un representante de Expourense.

17:30 h. - 19 h. (stand de Turgalicia en FITUR): reunións personalizadas ou en pequenos grupos, con inversores especializados na actividade termal. Asisten a concelleira de Urbanismo, Áurea Soto, concelleira de Turismo, Mónica Vázquez e concelleiro de Termalismo, José Ángel Vázquez Barquero.

20:30 h. - 22:30 h. (Hotel Preciados): Encontro con inversores e prescriptores do sector hoteleiro e termal, coa seguinte previsión:

20:30 h. Benvida e presentación do alcalde.
20:35 h. Proxección do vídeo “Ourense Capital Termal”.
20:45 h. Intervención do concelleiro de Terrmalismo sobre “o modelo termal da cidade de Ourense”.
21 h. Intervención da concelleira de Urbanismo sobre “planeamento urbanístico, instalacións termais e AVE”.
21:30 h. Debate

Venres, 1 de febreiro:

12 h. - 13:30 h. (stand de Turgalicia en FITUR): Reunións personalizadas ou en pequenos grupos, con inversores especializados na actividade termal. Asisten a concelleira de Urbanismo, Áurea Soto, concelleira de Turismo, Mónica Vázquez e concelleiro de Termalismo, José Ángel Vázquez Barquero.

Os dous foros, tanto o de Ourense coma o de Madrid, forman parte dunha das accións resultantes do convenio de colaboración entre o Instituto de Turismo de España e o Concello de Ourense para o desenvolvemento de inversións vinculadas ao Plan Estratéxico Termal.

Presentación de Xantar e promoción da cidade

Así mesmo, o alcalde de Ourense, Agustín Fernández, ten previsto asistir á presentación de Xantar, o 14º salón galego de Gastronomía e Turismo, tamén no marco da Feira Internacional de Turismo, o xoves ás 13:15 h, no propio stand de Turgalicia. Neste espazo, e nos catro días de permanencia da Feira, entre o 30 de xaneiro e o 3 de febreiro, o Concello de Ourense promocionará a súa riqueza termal, coa difusión de papelería, dípticos e información de interese turístico da cidade, así como a exhibición de campañas de comunicación vixentes, como “O verán continúa en Ourense”.