A oferta turística de Galicia difúndese no mercado alemán na Feira ITB de Berlín

Turismo de Galicia está presente na Feira ITB de Berlín. A directora de Turismo de Galicia, Nava Castro Domínguez, asiste a presentacións e encontros de traballo co obxectivo de difundir a oferta turística de Galicia para o mercado alemán. Entre os días 5 e 9 de marzo, a feira ITB de Berlín (Alemaña), un dos mercados turísticos máis importantes do mundo xunto aos certames World Travel Market (WTM) de Londres e a Feira Internacional do Turismo de Madrid (FITUR) contará cun stand no que se difundirán os principais recursos e produtos turísticos da comunidade galega.

Neste evento turístico dedicado ao turismo en xeral, Turismo de Galicia promocionará os valores turísticos galegos de xeito global e o Camiño de Santiago en particular. Ademais, Turismo de Galicia prestará unha especial atención á difusión da celebración do VIII Centenario da peregrinación de San Francisco de Asís a Compostela.

Nesta edición da ITB, Turismo de Galicia farase especial fincapé nos produtos relacionados coa natureza e o Turismo de costa, así como o Turismo cultural, que xunto co Camiño de Santiago e as cidades galegos, son os aspectos turísticos da Comunidade galega que máis interese espertan para os turistas alemáns.

Alemaña, un mercado fundamental para a comunidade galega
A participación neste certame turístico permitirá influír no mercado turístico alemán, un dos mercados internacionais máis importante para a Comunidade galega, xa que o 11,9 % dos estranxeiros que se aloxaron en establecementos regrados de Galicia o ano pasado foron alemáns.

Os alemáns situáronse no segundo lugar despois dos portugueses canto a ocupación nos establecementos turísticos regrados en Galicia en 2014, segundo os datos do Instituto Nacional de Estatística.

En todo o 2013 chegaron a Santiago un total de 16.203 peregrinos procedentes de Alemaña, o que supón o peso do 7,51% do total das nacionalidades, sendo o primeiro país estranxeiro no ranking de Compostelas recollidas na Oficina do Peregrino de Santiago de Compostela.

Presentación de Termatalia

A directora de Turismo de Galicia, Nava Castro Domínguez, realiza unha presentación da XIV edición de Termatalia dirixida a profesionais do turismo de saúde e da industria termal, así como touroperadores e prensa europea sobre as potencialidades de Galicia como destino termal e sobre a vindeira celebración da Feira Internacional de Turismo Termal que terá lugar nas Termas de Río Hondo, na provincia arxentina de Santiago del Estero entre os días 2 e 4 de outubro.