Skip to main content

Máis de 200.000 persoas enchen cada ano a Festa da Arribada da Carabela Pinta

A directora de Turismo de Galicia, Nava Castro, destacou no transcurso da presentación da Festa da Arribada da Carabela Pinta que contou coa participación do secretario xeral de Cultura, Anxo Lorenzo, e do delegado territorial da Xunta en Vigo, Ignacio López Chaves, a consolidación desta celebración que se converteu en todo un referente turístico que reúne no casco histórico da vila a máis de 200.000 persoas procedentes de todas as partes do mundo.

Como explicou, as actividades que se desenvolverán durante os días de celebración da festa -3, 4 e 5 de marzo-, son numerosas e de diversa índole, desde publicacións, seminarios, exposicións, conferencias, congresos, concertos así como eventos deportivos entre os que subliñou a ‘Regata del Descubrimiento’, con máis de 3.500 millas de percorrido e a participación de máis de 70 barcos de distintos países, que contribúe á difusión e promoción do turismo náutico e deportivo da nosa comunidade.

Durante o acto, que se celebrou no Museo das Peregrinacións, en Santiago de Compostela, a responsable de Turismo da Xunta de Galicia apuntou, ademais, á importancia histórica desta celebración que tamén inclúe actos como ofrendas florais, concesión de medallas e distintivos a persoas e institucións destacadas. Así como toda clase da actuacións relativas ao mercado medieval que rematan coa escenificación teatral da Arribada da Carabela Pinta á praia.

Xunta cada ano máis de 200.000 persoas

Tal e como explicou Nava Castro, todo isto converte á Festa nun “reclamo perfecto” para coñecer Baiona e na única celebración destas características en Galicia que se consolidou como “cita ineludible” no calendario festivo da nosa comunidade.

Ademais, a súa consolidación como referente turístico, recordou a directora de Turismo de Galicia, fai que acade unha “incidencia directa” na divulgación da oferta turística galega vinculada aos “extraordinarios recursos turísticos” deste país impulsando así a mellora económica do sector, dixo.

“Desde Turismo de Galicia somos conscientes de que as festas, polas súas características e singularidades e polo seu recoñecemento e prestixio autonómico, son un recurso a manter e potenciar. A súa celebración supón un importante reclamo de atracción turística e engaden importantes accións de difusión turística que constitúen un extraordinario incentivo para as economías locais”, explicou Nava Castro lembrando que é por iso polo que dende a Administración autonómica “fomentamos a súa difusión impulsando a promoción e mellora das festas de Galicia, especialmente as declaradas de Interese Turístico”, concluíu.

De Interese Turístico Internacional

A Festa da Arribada de Baiona está declarada como Festa de Interese Turístico Internacional e ten a súa orixe histórica no ano 1943, cando o un de marzo Martín Alonso Pizón arribou en Baiona e desde alí enviou a noticia do descubrimento de América aos Reis Católicos que se atopaban en Barcelona.

A tradición sinala que, desde esa data, se celebraron na vila multitude de actos conmemorativos do feito transcendental da arribada da carabela Pinta, o que fixo de Baiona o primeiro porto do vello continente en coñecer a noticia do Descubrimento.

Na actualidade e para conmemoralo, durante os días de celebración da festa, o casco histórico da vila de Baiona, declarado Conxunto de Interese Histórico Artístico, transfórmase e volta ao medievo e desenvólvense nela actividades numerosas e de diversa índole.

Gabinete de Comunicación da Xunta de Galicia