O fórum gastronómico da Coruña promove do 12 ao 14 de marzo o cooperativismo

A Consellería de Economía, Emprego e Industria e o Consello Galego de Cooperativas estará presente no Fórum Gastronómico 2017, que terá lugar en Expocoruña entre os días 12 e 14 de marzo, cun stand propio onde se informará sobre todos os aspectos do cooperativismo, as súas potencialidades e as solucións que ofrece como modelo empresarial capaz de manter e crear emprego.

No stand daranse a coñecer ao público e aos profesionais asistentes produtos e servizos prestados por 16 cooperativas galegas co fin de establecer contactos e relacións comerciais e de desenvolver redes de cooperación empresarial para, deste xeito, contribuír a fortalecer o sector e poñer en valor o feito diferencial cooperativo.

Así mesmo, as cooperativas asistentes participarán en encontros con doce importadores estranxeiros procedentes de Holanda, Bélxica, Reino Unido, Irlanda, Polonia e México co fin de darlles a coñecer os produtos novedosos e de calidade da gastronomía galega.

As cooperativas involucradas este ano, que presentarán produtos lácteos e derivados, apícolas, cárnicos, hortofrutícolas, do mar e da pesca, vitivinícolas e doutras bebidas son: Artesáns da Pesca, Cannaliza, Como Cabras, Condado Paradanta, Cooperativa Agraria Provincial, Cooperativas Lácteas Unidas, Milhulloa, Productores del Campo de Capela, Pulponor, Terras da Mariña, Verín-Biocoop e Vicogalo e as adegas cooperativas Jesús Nazareno, Virgen de las Viñas e Eidosela, ademais do centro especial de emprego Freshcut.

Nestes tres días, ademais, os visitantes que se acheguen á Coruña poderán participar en talleres de cociña, sesións monográficas de produtos, degustacións, exposicións de produtos alimentarios e artesáns ou concursos.

O Fórum, contará con máis de douscentos expositores, cen cociñeiros (sesenta deles galegos), dez food trucks, música, espectáculos e actividades monográficas sobre produtos específicos como o Túnel do Viño, A Coruña Sabe, o Recuncho do Café, o Fórum Doce, ou Fórum Viño, entre outros.