Presentados máis de 30 orixinais ao Concurso de Carteis da 34ª Festa do Queixo

Remata o prazo de recepción de orixinais do Concurso de Carteis Anunciadores da 34ª edición da Festa do queixo de Arzúa, logo de terse presentado preto de 30 propostas.

Do día 10 ao 31 de xaneiro realizarase unha exposición de todos os carteis na Capela da Madalena de Arzúa. A elección dos premiados realizarase a finais de xaneiro de 2009, mediante a valoración dun xurado cualificado designado pola Comisión “Festa do Queixo”, cun único voto por persoa, agás para o 4º premio, que será elixido por votación popular o domingo 11 de xaneiro, de 11.30 a 14.00 h na Capela da Madalena.

O xurado valorará de xeito especial a creatividade da arte final, a relación co evento a través da nosa cultura e idiosincrasia e o impacto visual publicitario dos carteis. A peza elixida polo xurado como 1º premio será o cartel anunciador da XXXIV edición.

O certame outorgará 4 premios nesta edición 2009, o primeiro, segundo e terceiro premio obterán unha dotación económica de 600, 300 e 150 euros respectivamente. Mentres que o cuarto premio, elixido en votación popular, obterá un agasallo especial da organización. Para a entrega de premios celebrarase un acto especial, que se incluirá no Programa Oficial da 34ª Festa do Queixo de Arzúa.

O Concello de Arzúa celebra tradicionalmente a Festa do Queixo de Arzúa na primeira fin de semana do mes de marzo, este ano dita celebración terá lugar os días 13, 14 e 15 de marzo.