Revólver abre as Festas de Verán 2009 de Ferrol

Vetusta Morla, Revólver, Nena Daconte, Melendi, Fuxan os Ventos, Orquesta Olympus, Som do Galpom, Violadores del Verso, Aló Djangó, festivais de rondallas... son algunhas das propostas incluídas no programa de Festas de Verán do Concello de Ferrol que presentaban o alcalde, Vicente Irisarri, e a concelleira de área, Beatriz Sestayo. Unha oferta que por primeira vez nace da participación cidadá, xa que se elaborou en base ás peticións e suxestións que os cidadáns e cidadás fixeron chegar á institución local a través dun correo electrónico habilitado ao efecto e tamén de xeito presencial. Preto de 800 persoas enviaron durante semanas os seus e-mails, e outras moitas remitiron as súas cartas ou achegaron as súas propostas no Edificio Social e no Concello para configurar o programa que hoxe se daba a coñecer publicamente, coa suficiente antelación para poder publicitalo convenientemente de modo que tanto os ferroláns como a xente de fóra inclúa as propostas nas súas axendas de verán. En todo caso, o alcalde destacou que se trata dunhas Festas de Verán plurais, orientadas a todos os gustos e idades, onde os auténticos protagonistas son os cidadáns e as cidadás.

Vicente Irisarri destacaba tamén a capacidade de xestión da concelleira e do equipo do departamento municipal para configurar un cartel de calidade coa limitación de recursos e necesaria austeridade nun momento de crise. Nesta liña, Beatriz Sestayo indicaba que o orzamento se sitúa nos 278.000 euros, unha cifra moi inferior á do ano pasado, pero que se soubo contrarrestar intensificando as negociacións. Lembrou tamén neste senso que o Concello decidía abrir un proceso de contratación ao que concurriron varias productoras de espectáculos, así como que a Comisión de Festas -na que están representados comerciantes, hosteleiros, veciños e Concello- aprobara por unanimidade a programación tras analizar as propostas presentadas.

Deste xeito, as Festas de Verán se concentrarán, como no 2008, entre o 21 e o 31 de agosto. Todos os días Ferrol contará con espectáculos a pé de rúa, con teatro de títeres, shows circenses, maxia... actividades pensadas especialmente para os máis pequenos da casa. En canto ás actuacións, se irán rotando entre prazas. Principalmente Armas e Amboage e, dependendo da evolución da actuación prevista na praza de España, se incluirá como esceario. Outro dato salientable é que a entrada a cada un dos concertos e festivais será gratuíta, coa excepción de Melendi (o día 24 de agosto, Parque Raíña Sofía). Neste caso, Beatriz Sestayo apuntou que se está a negociar un prezo módico, asequible para o cidadán que, en ningún caso, excederá os 15 euros.

E, por orde, sinalou que o día 21 de agosto, por aclamación popular, chegará Revólver. A banda de Carlos Goñi se sitou entre as principais preferencias dos cidadáns e cidadás que enviaron os seus e-mails ao Concello e, de feito, se mantivo no primeiro posto do ránking ata as últimas semanas, cando foi desbancado por Violadores do Verso, un grupo de hip-hop que actuará ao día seguinte e que conta cun público moi fiel. O día 23 estará reservado para a actuación de grupos locais, aqueles que se presenten ao concurso de maquetas aberto polo Concello baixo a denominación de Sons de Ferrol. Tras o dito concerto de Melendi, a cidade acollerá o espectáculo de Fuxan os Ventos, incluído á súa vez na programación do Xacobeo. A orquesta Olympus, unha das peticións máis reiteradas entre a cidadanía, ofrecerá o seu mellor repertorio o día 26. A banda de pop Nena Daconte se subirá ao escenario o 27, namentras que o grupo galego Som do Galpom, que se sitou nos primeiros dez postos do ránking cidadán, fará o propio o día 28. O rock indie de Vetusta Morla soará na cidade o día 29, para dar paso a Aló Djangó o 30. Os fogos de artificio e un festival de rondallas, que o Concello recupera tras anos no esquecemento, porán o punto e final ás Festas de Verán.

Ao marxe destas, Beatriz Sestayo avanzou que se están a pechar algunhas actuacións a maiores, así como que a Feira Medieval se celebrará a principios do mes de agosto e que o Día da Xuventude e o Día da Solidariedade serán dúas datas para as que o Concello disporá programación propia.