A Coral do Hospital Xeral-Calde, o Orfeón Lucense e a Schola Gregoriana enchen as rúas de Lugo de cantos de Nadal

As corais lucenses encheron de novo, con grande éxito, as rúas de Lugo de música nestas datas, con “Cantos de Nadal”, a iniciativa posta en marcha pola Vicepresidencia Primeira da Deputación, que amenizou o centro da cidade con panxoliñas en directo interpretadas polas agrupacións de música vocal os días 22, 23 e 30 de decembro. O 5 de xaneiro, como despedida, todas as corais que actuaron dentro deste ciclo se xuntarán na praza de Santa María.

Tralo éxito acadado polo I Encontro de Corais de Lugo, “Voces na Rúa”, que se celebrou do 22 ao 28 de novembro, as agrupacións Cantar Delas, o Orfeón Lucense, Xoan Montes, o Coro de San Antonio, a Coral Xolda, a Coral do Hospital Xeral, Novo Amencer, o Conxunto Vocal Lugh, a Coral de Amigos do Camiño de Santiago e a Schola Gregoriana Lucensis, actuaron estes días na Porta do Bispo Aguirre, a Praza Maior, a Praza do Campo e a Praza da Soidade , entre as 20:00 e as 21:00 horas. O día 5 de xaneiro, tamén de 20:00 a 21:00 horas, na Praza de Santa María, terá lugar un encontro de todas as corais, que cantarán xuntas os temas “Adeste Fideles” e “Noite de Paz”.