Turismo presenta en Brasil a oferta enogastronómica galega en Millesime 2011

A secretaria xeral para o Turismo, Carmen Pardo López, presentou en Brasil, no marco do evento gastronómico Millesime 2011, a oferta gastronómica de Galicia. Esta é a primeira edición de Millesime en São Paulo despois de terse celebrado en 4 ocasións en Madrid e dunha incursión en Cap Cana, na República Dominicana. Millesime celébrase no Terraço Daslu, un espazo artístico e cultural situado no centro de São Paulo, e está enfocado a públicos especializados e de prestixio do sector.

No marco deste evento gastronómico, Carmen Pardo ofreceu unha presentación aos medios sobre a oferta enogastronómica da nosa Comunidade. A Consellería de Cultura e Turismo promove a participación en Millesime de chefs galegos de recoñecido prestixio, como Xosé Torres Cannas, do restaurante Pepe Vieira; Pepe Solla, do restaurante Casa Solla e Marcelo Tejedor, do restaurante Casa Marcelo, encargados de realizar diversas demostracións e ‘showcookings’ para o público asistente. Segundo destacou Carmen Pardo na súa intervención, “trátase do mellor exemplo da exquisitez da nosa gastronomía ao seren capaces de sacar, dende a complicada sinxeleza e a madurez máis xenerosa, o máximo partido aos produtos que nacen da terra”.

Millesime inclúe ademais workshops ou pequenas clases maxistrais que ofrecen a posibilidade única de interactuar cos mestres millesime –cociñeiros de gran renome e prestixio internacional- en talleres de viño, cervexa e cociñando diferentes pratos, unha cociña doada para sorprender e espertar aos sentidos. Millesime tamén acolle eventos relacionados coas tapas e a súa elaboración e degustación no Open Bar, xantares nos que os 800 convidados poden disfrutar de experiencias únicas con equipos de dous chefs españois e un brasileiro que se encargarán de elaborar menús degustación espectaculares. Despois dos xantares tamén se poderán degustar no Open Bar cocktails, doces, chocolates, destilados, etc.

Oferta enogastronómica de Galicia

A Consellería de Cultura e Turismo leva a Millesime 2011 unha escolma do mellor da gastronomía galega. A secretaria xeral para o Turismo transmitiu na presentación a súa satisfacción porque Galicia “ofreza a todo o mundo a posibilidade de acercarse a disfrutar dos manxares galegos, a través dunha plataforma única e singular como Millessime”. “As despensas galegas contan cunha das ofertas máis interesantes de todo o país, cunha ampla e variada gama de materias de primeiras de calidade”, asegurou Carmen Pardo, aludindo á gastronomía como a segunda razón turística, tras a natureza, pola que milleiros de persoas chegan a coñecer Galicia cada ano.

Carmen Pardo tamén destacou que a gastronomía galega “non se pode entender sen a enoloxía, que ocupará un lugar moi destacado no evento, coa presenza de diferentes sumilleres e adegas”. Nese sentido, sostivo que Galicia “soubo combinar como poucos a tradición e a modernidade, dous ingredientes fundamentais para garantir a satisfacción de todos”.