Nortrans medra nun 30% a súa superficie expositiva

Nortrans 2011 foi presentado esta mañá en Expourense nun acto no que estiveron presentes o delegado territorial da Xunta de Galicia, Rogelio Martínez, o presidente do comité executivo de Expourense e da Cámara de Comercio de Ourense, Celso Barbosa, a concelleira de transporte Público de Ourense, Susana Bayo, o presidente do Comité Galego de Transporte e do comité asesor de Nortrans, Raúl López, e o director xerente de Expourense, Alejandro Rubín.

Cunha vintena de sectores representados, Nortrans, que se celebrará en Expourense os días 2 e 3 de setembro, contará coa presenza das principais empresas carroceiras de España e Portugal que presentarán os últimos modelos en vehículos de transporte de viaxeiros e mercadorías. Ademais da industria carrocería, poderán atoparse outros servizos como recambios, limpeza, formación, seguridade e localización GPS, reparación, etc. e tamén a presenza en feira de institucións como a Consellería de Medio Ambiente, Territorio e Infraestruturas, a través da Dirección Xeral de Mobilidade, ou de Portos de Galicia. Por procedencia, Galicia é a comunidade que conta cun maior número de expositores (o 65%), seguida por Madrid e Euskadi.

Nortrans, cuxo comité organizador ten á fronte ó presidente do Consello Galego de Transportes, volverá contar co firme apoio das principais federacións empresariais do sector en Galicia, tanto de viaxeiros como de mercadorías, como son ANETRA, FEGABUS, FEGATRAMER, TRANSGACAR, ORENCAR, APETAMCOR, ATVC, AETRANS, ACOAG e FEGATRAVI. Ademais, o salón conta tamén coa colaboración, por primeira vez da Asociación Nacional de Vendedores de Vehículos a Motor, GANVAM.

Todos eles mostraron o seu firme compromiso e apoio a Nortrans, un salón profesional que consideran propio e que lles serve de punto de encontro e debate para analizar a situación actual do sector e da legislación vixente, así coma novas oportunidades de negocio ou a viabilidade dos servizos.

Por este motivo, serán varias as asociacións de profesionais que celebren as súas xuntas directivas e asembleas anuais no marco desta cita. Este é o caso do Comité Galego de Transporte de Viaxeiros, de TRANSGACAR, ou de FEGATRAMER. Ademais, APETAMCOR aproveitarán a presenza dos seus asociados en Nortrans para organizar o acto de entrega a transportistas das distincións: “Selo de Boas Prácticas Preventivas” e o “Selo de Calidade 5 anos”.

VIII Xornadas Técnicas de Transporte de Mercadorías e Viaxeiros

A Xornada de Transporte de Viaxeiros, que terá lugar o venres 2 de setembro, comezará coa análise do impacto da Lexislación Europea sobre o ordeamento xurídico español do transporte de viaxeiros que será explicado polo Subdirector Xeral de Ordenación e Normativa da Dirección Xeral de Transporte por Estrada do Ministerio de Fomento, Emilio Sidera. Pola súa parte, o presidente do Comité e Consello Nacional de Transportes Terrestres de España, Rafael Barbadillo, explicará en detalle a Política Europea de Transportes. Esta xornada rematará cunha mesa redonda sobre os modelos de financiamento do Transporte Público no que participará a Dirección Xeral de Mobilidade da Xunta de Galicia e os presidentes das principais asociacións profesionais de transporte de viaxeiros: ANETRA, FEGABUS, TRANSGACAR e FEGATRAVI.

O sábado 3 de setembro celebrarase a Xornada sobre Loxística que estará organizada pola secretaría Técnica do Proceso de Constitución do Clúster da Loxística de Galicia se estreará organizando en Nortrans as súas primeiras actividades. Esta xornada contemplará o aproveitamento das plataformas loxísticas do transporte de mercadorías para analizar cómo se podería integrar a rede loxística de Galicia e para marcar as liñas de actuación a seguir. Nesta xornada exporán a súa experiencia empresas doutros sectores integradas en clusters empresariais como o agroalimentario e o textil.

A asistencia a estas xornadas precisa de inscrición previa a través da web www.expourense.org ou do número de teléfono 988 36 60 30.

Ademais das xornadas técnicas, Nortrans acollerá distintas presentacións de firmas comerciais. Entre elas destaca a de IRIZAR, que aproveitará a súa presenza na feira para dar a coñecer a súa gama completa de autocares. Por outra parte, Locatel Flotas presentará un novo software de xestión online para o control dos tempos de condución.

O horario de apertura de feira será, venres e sábado, de 11.00 a 14.30 e de 16.00 a 20.00 horas.