O público reitera a súa fidelidade á Mostra da Oportunidade de Expourense

A falta de contabilizar as últimas visitas de hoxe, o día de maior afluencia dos tres que durou a feira, a organización calcula que foron máis de 15.000 visitantes os que aproveitaron os mellores prezos en milleiros de artigos que ofrecía a maior liquidación de stocks de Galicia. A Mostra converteuse esta fin de semana nunha cita para toda a familia á que contribuíu a zona de ocio pola que pasaron centos de nenos menores de 12 anos.

A Mostra da Oportunidade consolídase así como un bo escaparate do comercio galego, xa que foron moitos os expositores que indicaron que neste evento tomaron contacto con novos clientes, que mostraron por interese polo seu produto e por coñecer onde se ubica esa tenda para visitala a medio prazo. O téxtil volveu ser un dos sectores máis demandados destacando as compras realizadas en prendas de pel, traxes de chaqueta de señora e cabaleiro, prendas de abrigo, deportivas e infantís.

Todos que se decidiron á visitar a Mostra da Oportunidade pudieron atoparse cunha ampla oferta de máis dunha vintena de sectores sendo a maior parte dos expositores eran ourensáns, polo que esta cita se converte ademais nun dinamizador do comercio local grazas tamén a presenza de distintos centros comerciais como o de Ourense centro, o Couto, Pontevella, e os de Verín e O Barco de Valdeorras.

O moble foi o sector que maior superficie ocupou na feira e os sofás, dispoñibles en todos os estilos, formatos e con ata un 55% de desconto, foron un dos produtos con máis saída nesta edición. Outros artigos de menos tamaño e importe como os puffs, os colchóns, as alfombras ou o moble auxiliar tamén rexistraron bos niveis de venda, ó igual que os electrodomésticos que presentaban ofertas especiais de feira de ata o 50%.

Destacou ademais a oferta en automoción. Os visitantes tiveron a oportunidade de adquirir, con descontos de ata 3.000 euros, distintos vehículos seminovos e de ocasión de varios modelos.

O balance da 19ª edición poderíase resumir así: maior calidade dos produtos ofrecidos, fidelidade do público e o sector con máis éxito, o téxtil.

Expourense pecha así o calendario feiral do primeiro trimestre do ano e prepárase para a súa próxima cita: PREVISEL, Salón da Prevención e Seguridade Laboral que celebrará a súa sétima edición entre o 17 e o 18 de abril.