O 8º Salón Galego das Persoas Maiores, Galisenior, en Expourense o 25 e 26 de maio

As xornadas técnicas de Galisenior, dirixidas a todos os profesionais que traballan no eido do maior, incluirán un seminario sobre a aplicación das novas tecnoloxías á estimulación da cognición e a analizar o proceso que vai dende o deterioro cognitivo ata a demencia. Este tema, xunto á prevención de riscos no contorno habitual do maior, foron os novos temas propostos polos membros do comité asesor de Galisenior durante a súa segunda reunión. O Salón Galego das Persoas Maiores chegará a súa oitava edición en Expourense os días 25 e 26 de maio. Esta cita, de carácter bienal, servirá ademais de punto de encontro dos profesionais do sector, dos maiores e das súas familias para darlles a coñecer todos os servizos e produtos existentes para mellorar a súa calidade de vida.

Estes novos temas súmanse aos xa incluídos no programa dunhas xornadas profesionais que servirán de marco para analizar cómo viven e cómo senten e qué demandan as persoas maiores convertendo a este salón nun centro de reflexión e intercambio de experiencias e metodoloxías para afrontar o reto do envellecemento poboacional. Presentaranse as últimas innovacións e proxectos vencellados ó sector do maior levados a cabo en Galicia e abordará temas como o envellecemento activo, a defensa dos maiores e o seus dereitos, a adopción de hábitos de vida saudables ou a participación social, entre outras. Estas xornadas teñen solicitados créditos de libre configuración nas tres universidades galegas e na UNED. Entregarase diploma acreditativo.

Outra das novidades será a presentación do 54º Congreso da Sociedade Española de Xerontoloxía e Xeriatría e o 24º Congreso da Sociedade Galega que se celebrarán en Santiago entre o 6 e o 8 de xuño baixo o lema “un camiño cara un novo envellecemento”. Este encontro reunirá a máis de 2.000 especialistas do sector de toda Europa.

Actividades para maiores

Outro dos obxectivos do comité asesor de Galisenior foi elaborar un completo programa de actividades e obradoiros para que os maiores que visiten o salón participen activamente ó tempo que se promove un envellecemento activo, saudable e feliz. O programa de actividades para maiores de Galisenior conta, polo momento, con medio cento de obradoiros centrados nas principais afeccións dos maiores de Galicia como poden ser o baile, a risoterapia, as actividades deportivas ou os traballos manuais. A principal novidade desta edición será a organización dunha Andaina dende Expourense ata a área termal de Outariz que inclúe baño e xantar campestre, e outra máis curta ata As Burgas. Os paseos conxugaranse con obradoiros de pilates, Tai-Chi, aerobic con coreografía e exhibicións de baile, entre outras actividades.

Galisenior ofrécelles ademais a posibilidade de achegarse ás novas tecnoloxías e de compartir tempo e espazo con outras xeracións e é este neste eido onde se atopa unha das novidades máis salientables de Galisenior 2012. Os maiores crearán un blog no que relaten a súa experiencia no salón e participarán nun maratón de fotografía dixital no que inmortalizarán aqueles aspectos e actividades da feira que máis lle chamen a atención. Tamén terán a oportunidade de compartir xogos e karaoke na Wii con visitantes doutras xeracións.

Dúas das entidades integradas no Comité organizador, a Xunta de Galicia e a Obra Social de Novacaixagalicia, xa mostraron o seu compromiso coa feira e van mobilizar aos usuarios dos servizos, como é o caso dos centros sociocomunitarios da provincia de Ourense, que prestan ata Galisenior para que poidan gozar dunha xornada de diversión, coñecemento e intercambio de experiencias.

Exposición

Galisenior ofrecerá unha ampla mostra de produtos proxectados exclusivamente a brindar unha mellor calidade de vida aos nosos maiores, proporcionándolles a oportunidade de intervir activamente na sociedade, fomentando a súa autonomía, independencia e liberdade. Tamén se poñerán en coñecemento de todos os profesionais e das súas familias os servizos de atención que ofrecen entidades públicas e privadas. Con todo iso, perséguese, orientar a este colectivo, abordando entre outras cousas, unha preparación física e psicolóxica que permita gozar dun envellecemento activo e saudable.

Comité Asesor

O comité asesor de GALISENIOR 2012 está integrado polos principais axentes sociais tanto públicos coma privados que traballan a prol do benestar do maior como é o caso da Consellería de Traballo e Benestar da Xunta de Galicia, a Concellería de Benestar Social do Concello de Ourense, Obra Social de Novacaixagalicia, Geriatros, Fomento de Servizos Sociosanitarios, as tres universidades galegas, distintos colexios profesionais, a Sociedade Galega de Xerontoloxía e Xeriatría, Cruz Vermella e varias empresas provedoras de servizos. Tamén están integradas neste comité as principais asociacións que reúnen aos maiores que ademais mobilizarán aos seus asociados para que participen nas actividades do salón.