Viñerón 2013 reúne na Cidade da Cultura a empresas e viticultores de vangarda

A Consellería de Cultura, Educación e Ordenación Universitaria contribúe á promoción e difusión da cultura do viño fomentando o encontro entre profesionais e empresas de calidade no Viñerón 2013, feira vitivinícola que reúne o sábado 30 de novembro no Gaiás aos vinte mellores viticultores da vangarda europea.

Tras o éxito da primeira edición, que conseguiu congregar a máis de 300 asistentes, o ‘Viñerón 2013’ volverá reunir o sábado, 30 de novembro a partir das 15:00 horas, a entusiastas do viño, profesionais do sector hosteleiro, agroalimentario e turístico, así como bloggers e medios de comunicación especializados ao redor dos traballos máis destacados no mundo do viño. Un encontro de calidade que contribuirá a fomentar a cultura do viño e dar a coñecer a excelencia dos caldos que se producen en Galicia, así como das súas empresas.

Os viticultores convidados a participar no Viñerón 2013 foron seleccionados entre os que desenvolven na actualidade un traballo destacado de investigación e innovación en viticultura, variedades de uva, vinificacións, etc. Entre eles, estarán Elogio Pomares de Bodegas Zárate nas Rías Baixas e Rafael Palacios de Valdeorras como representación dos caldos galegos; Luis Seabra e Cristiano Van Zeller con viños do Douro (Portugal); Germán R. Blanco co Ribera del Duero ‘Quinta de Milú’; Nicolás Marcos de Cangas del Narcea; Gutiérrez Colosía de Jerez; ou os franceses Jean Michel Gerin (Domaine Jean Michel Gerin, Côte-Rotie) e Laurent Combier (Crozez-Hermitage).

Galicia emerxente

Unha das novidades deste ano é a sección ‘Galicia emerxente’, na que se lle dará espazo aos viticultores galegos que, aínda con poucas colleitas ás súas costas, están chamando moito a atención polo seu gran talento.

Nesta sección estarán presentes Manuel Moldes, da Finca A Pedreira (Rías Baixas), Jorge Pérez-Merencio (Ribeiro), Alberto Nanclares (Rías Baixas), Xurxo Alba con Albamar (Rías Baixas) e Xosé Luis Arístegui (Valdeorras).

Para poder asistir ao ‘Viñerón 2013’ hai que mercar a entrada a través da web www.institutogalegodovino.com, onde tamén se pode consultar o programa.