Skip to main content

O Noroeste Estrella Galicia culmina a súa 32ª edición con máis de 90.000 persoas para consolidarse como un dos grandes festivais urbanos estatais

Unha ebulición e unha efervescencia contaxiosa entre aqueles e aquelas que repiten ou que asisten por primeira vez e que puido comprobarse a través da proxección nos medios de comunicación e as redes sociais.

Máis de 150 horas de música en 14 escenarios singulares para unha edición onde o punto diferencial estivo marcado pola presenza feminina. O 54% das bandas estaban lideradas por unha muller ou eran solistas femininas, mentres que no 72 % de bandas polo menos unha das súas compoñentes era muller. Así mesmo, do mesmo xeito que outros anos, o festival apostou por artistas de Galicia, que supuxeron preto dun 50% do cartel.

As cifras de asistencia lograron grandes picos ao longo da semana. No primeiro día de concertos por distintos lugares emblemáticos da cidade, o chamado Noroeste Expandido, chegáronse a registrar máis de 10.000 persoas. Un día despois, o mércores 8 de agosto, celebráronse máis da metade de actuacións previstas a pesar da choiva, que obrigou a cancelar oito concertos –catro na Praza das Bárbaras e catro na Praza de San Nicolás-. Con todo, a actuación estelar da portuguesa Dona Rosa, que debía celebrarse no Castelo de Santo Antón, puido recolocarse no Teatro Colón evitando así a súa cancelación. O xoves todo volveu á normalidade e tras gozar de tres días de Noroeste Expandido, contabilizáronse máis de 20.000 persoas nos escenarios do festival.

Con respecto á Selección Noroeste, os tres concertos programados nos teatros da cidade -Neneh Cherry, Maria del Mar Bonet e James Holden & The Animal Spirits- lograron un amplo número de oíntes, máis de 1.500 asistentes en total, abrindo o espectro musical e de idade con cada unha das súas actuacións.

Na praia, os escoceses Belle & Sebastian convenceron ao público o venres ofrecendo un recital para máis de 15.000 almas onde corearon cancións de todas as súas épocas. O seu líder, Stuart Murdoch, acirrou a audiencia ata convidar a varias persoas para subirse ao escenario e terminar cun apoteósico baile grupal. Pola súa banda, Chrissie Hynde os seus aterraron na Praia de Riazor congregando a máis de 30.000 persoas nun concerto de The Pretenders impecable, coa voz da estadounidense en estado de graza, e no que non faltaron moitos dos seus éxitos.

Éxito das Matinais

Unha das apostas máis importantes do festival, os concertos das Matinais, consolidouse nesta edición como unha das actividades preferidas do público ao congregara máis de 4.500 persoas durante as tres xornadas. A elección de bandas, cada vez máis eclécticas, logrou que a súa audiencia crecese nesta edición e que houbese aforamentos completos, como co concerto de Los Nastys na rúa Capitán Troncoso ou o de Esteban & Manuel na Praza José Sellier. A celebración musical por toda a cidade invadiu as diferentes prazas durante os tres días que tiveron lugar.

Difusión en todo o estado

A importante presenza en medios locais, autonómicos e estatais do Noroeste Estrella Galicia segue a afianzarse nesta edición do festival, que logrou proxectar desta maneira a imaxe transformadora de cidade musical, próxima e cosmopolita que posúe A Coruña.
En internet, o festival alcanzou un forte impacto, con case 290.000 visitas na web oficial e cun alcance en redes sociais que superou os 3,1 millóns de persoas. O Noroeste Estrella Galicia ten máis de 25.500 seguidores e seguidoras en redes, que o levaron a ser Trending Topic na Coruña co seu perfil de usuario @FestNoroeste e cos hashtags desta edición: #Noroeste2018 e #SOMOSNOROESTE. Este último situouse ademais entre os 100 primeiros do ámbito estatal durante os dous primeiros días.

Dispositivo de protección ambiental

Dentro do seu Plan de Eventos Sustentables, a Concellería de Medio Ambiente desenvolveu unha serie de medidas orientadas a diminuír o impacto ambiental do Festival Noroeste Estrella Galicia, contribuíndo -xunto coa limitación da programación de concertos de rúa en horarios nocturnos, para minimizar a contaminación acústica, e coas accións de mobilidade orientadas ao fomento do transporte público e á redución de emisións- a celebrar un evento máis sustentable e máis respectuoso coa cidadanía, co espazo público e co planeta.

Respecto ao dispositivo de protección ambiental, este ano volveu apostarse pola utilización do ecovaso, producido pola entidade Ecovidrio, nos concertos da praia e na romaría do domingo, debido á especial preocupación do goberno municipal por reducir o impacto ambiental dos eventos que suceden en contornas naturais. Distribuíronse 6.000 unidades a un prezo de 1 euro, concienciando ademais do seu uso desde as pantallas da praia de Riazor e incidindo na importancia de non tirar residuos no areal, así como do uso das Illas de Reciclaxe.

Agradecementos a colaboradores e público

O éxito do Festival Noroeste Estrela Galicia 2018 non sería posible sen a axuda do patrocinador principal, Estrella Galicia, e as distintas entidades colaboradoras, CUAC FM, a asociación Desconcierto Cultural e Radio 3. Do mesmo xeito, a organización quere agradecer ás salas Mardi Gras e Playa Club a súa disposición para a recolocación dos concertos que debían celebrarse no Mercado da Colleita e que, debido a causas meteorolóxicas, houbo que reubicar.
R.