Presentado o Salón da Prevención e a Seguridade Laboral: Previsel

A Consellería de Traballo instou ás empresas a “asumir o seu papel como motor de prevención”. Con ocasión da presentación do Salón da Prevención e a Seguridade Laboral (Previsel), que dá comezo o venres 1 de xuño en Expourense, a delegada de Traballo na provincia, Carmen Rodríguez Dacosta, subliñou que os medios para a prevención da sinistralidade laboral non poden quedar soamente na sanción, senón que precisan da implicación dos axentes socias e económicos e de toda a sociedade.

“As empresas deben asumir o seu papel como motor da prevención no seu seo”, defendeu, “e por iso este salón dedica unha parte moi especial ás súas iniciativas, e á problemática que xorde na posta en práctica da prevención integrada dentro das mesmas”.

Para reducir a sinistralidade laboral, argumentou, hai que actuar “non unicamente con instrumentos coercitivos”. Ao seu xuízo, a Lei de Prevención de Riscos Laborais “e a lóxica” apuntan a que só “unha extensión moi ampla da cultura preventiva e unha implicación fonda de todos os intervintes” poden contribuír a camiñar cara a unha necesaria redución da accidentalidade, así coma dos costes sociais, económicos e empresariais que se producen.

Neste senso, a delegada de Traballo en Ourense cualificou como “importantísimo” o diálogo social, que xa deu como froitos os acordos referentes ao Plan Estratéxico de Prevención de Riscos Laborais e a Lei de creación do Instituto de Seguridade e Saúde Laboral de Galicia (ISSGA).

Non obstante, precisou que “tamén son importantísimas” iniciativas como Previsel, para fomentar a cultura preventiva e “estender tanto o coñecemento da normativa e das súas implicacións, como os medios técnicos para poder levar a cabo o traballo coa prevención integrada, tal e como marca a lexislación”.

Así pois, Rodríguez Dacosta salientou que o Salón da Prevención e a Seguridade Laboral conta coa presenza de empresas de diversos sectores produtivos que amosan a súa visión da prevención, así como de empresas especializadas en medios técnico-preventivos. O certame inclúe tamén representación de servizos de prevención alleos, e ten prevista a participación dos representantes dos traballadores, dos empresarios e da Administración.

A responsable da Consellería de Traballo en Ourense manifestou a intención deste departamento da Xunta, que cofinancia a feira, de “aproveitar o máximo posible un salón enfocado tanto aos traballadores como aos empresarios, ademais de ás persoas de próxima incorporación ao mercado laboral”. “Este salón aproveita, así mesmo, a simultaneidade coa feira do transporte para abordar cuestións relacionados co devandito sector e coa seguridade viaria, fonte de moitos sinistros laborais”, apuntou.

Na presentación de Previsel participaron ademais Alejandro Rubín e Francisco Rodríguez, en representación das entidades organizadoras do salón, Expourense e a Confederación de Empresarios de Ourense, respectivamente.